Björn Baldursson Björn Baldursson | ţriđjudagurinn 29. apríl 2014

Viđhald á Turnhúsi

1 af 3

Turnhúsið í Neðstakaupstað var byggt árið 1783. Viðirnir í því eru mikið til upprunalegir utan nokkrir stokkar sem skipt var um þegar gert var við húsið. Það er því ekki að undra þó eitthvað láti undan tímans tönn. Nokkur fúi er kominn í nokkra stokka og þarf að skipta um og sponsa í. Magnús Alfreðson trésmiður vinnur að því þessa dagana.

Björn Baldursson Björn Baldursson | miđvikudagurinn 23. apríl 2014

Vélsmiđja Guđmundar J.Sigurđssonar

Vélsmiðja Guðmundar J. Sigurðssonar er elsta starfandi vélsmiðja landsins. Smiðjan sem er nánast í upprunalegu formi ber nafn Guðmundar J. Sigurðssonar sem stofnaði smiðjuna ásamt Gramsverslun eftir að hann kom heim frá vélsmíðanámi í Danmörku. Gramsverslun styrkti hann til náms með því fororði að hann ynni hjá þeim í einhvern tíma eftir að hann lyki námi. Vélsmiðjan varð fljótt þekkt fyrir vandaða og góða þjónustu. Á stríðsárunum þegar erfitt var að útvega varahluti voru steyptir þar varahlutir af öllum stærðum og gerðum, í erlend sem innlend skip. Einnig var smiðjan skóli í málmiðnum og þar var eftirsóknarvert að læra sökum þess hve fjölbreyttur smiðjureksturinn var. Þar lærðu menn  logsuðu, rafsuðu, rennismíði, járnsmíði í eldsmiðju, málmsteypu og flest annað sem gert er í smiðju.

Smiðjan var rekin allt til ársins 1995, en þar er enn unnið eftir atvikum við allskyns vélsmíðavinnu og málmsteypu.

Byggðasafn Vestfjarða hefur nú tekið við smiðjunni til varðveislu og í sumar verður hún opin á opnunartíma Byggðasafnsins, þ.e. alla daga frá kl. 9-18 á tímabilinu 15 maí - 15 september. Kristján Gunnarsson verður eftir sem áður aðalumsjónarmaður smiðjunnar og verður þar við vinnu eftir atvikum ásamt fleirum. Inni í smiðjunni verður sjónvarpsskjár þar sem verða sýnd myndbrot úr smiðjunni frá fyrri tímum.

Björn Baldursson Björn Baldursson | miđvikudagurinn 8. janúar 2014

100 ára annáll

1 af 2

Nú er árið 2014 gengið í garð og enginn veit hvað það kann að bera í skauti sér. Í fyrsta tölublaði Vestra árið 1914 birtist þessi annáll ársins 1913, væntanlega samantekinn af Kristjáni Jónssyni frá Garðsstöðum sem var ritstjóri blaðsins. Það er fróðlegt að lesa hvað það var sem helst brann á fólki fyrir 100 árum síðan. 

 

Árið   1913.

 

Árið sem leið var að ýmsu merkisár og tíðindasamt víða um heim, þótt skiftar verði sjálfsagt skoðanir um ágæti þess. Mestum tíðindum mun Balkanstyrjöldin verða talin sæta, er fram í sækir og fræðimennirmr skrá

atburði ársins á spjöld sögunnar. Eru þó ekki full málalok orðin á enn þá, og verður það að líkindum hlutverk næsta árs að geyma úrslit þeirrar styrjaldar í skauti sínu. Skiftir allmiklu hver þau málalok verða, hvort Tyrkir verða að mestu útlægir gerðir úr Norðurálfunni, — hvort hinar þjóðirnar koma sér saman til fullnustu um landaskiftinguna, og hvort stórveldin lenda eigi í erjum sín á milli út af öllu saman.

Allur þessi ófriður hefir fært mönnum áþreifanlega heim sanninn um það hvorttveggja, að enn þá er siðmenningin hjá hvítu mönnunum eigi komin lengra, en þetta stríð ber vott um, og hinsvegar magnleysi og ef til vill viljaleysi hinna svonefndu stórvelda til þess að afstýra ófriði þessum eins og þó var látið í veðri vaka í byrjun að gera ætti.

Árferðið hefir verið óvenju misjafnt. Veturinn var víst allstaðar fremur mildur og hagstæður, en kuldahret geysaði um alt land fram í miðjan maí.

Sumarið ágætlega hagstætt norðanlands og austan, en afar óþurkasamt sunnanlands, og víðasthvar vestanlands.

Verslunin hefir verið fremur hagstæð, verð á innlendri vöru hátt, einkum kjöti og sömuleiðis saltfiski, og útlenda varan fengist með sæmilegu verði.

Landfarssóttir hafa engar geysað, en alt um það hefir dáið fjöldi merkra manna fjær og nær, meðal þeirra má nefna: Eirík meistara Magnússon í Cambrigde (d; 25. jan.), Guðlaug Guðmundsson sýslum. (5.ág.), Steingrím Thorsteinsson skáld (21. ág.), prestana Kjartan próf, Einarsson í Holti (28. mars), séra Bened. Eyjólfsson í Bjarnarnesi (í júni) og sr. Arnór Þorláksson á Hesti (1. ág.), Kr. H. Jónsson ritstj.(27. sept.), Sölva Thorsteinsson dannebrm. o.fl., o.fl. Af konum eru þær nafnkunnastar: biskupsfrú Valgerður Jónsdóttir (d. 29. jan.) og ráðherrafrú Ragnheiður Hafstein (d. 16. júlí). .

Slysfarir á sjó hafa orðið óvenju miklar, eigi síst hér vestra. Fyrst fórst vélarbátur héðan úr bænum með 5 mönnum 9. janúar. Bátur við Ólafsvík í apríl með 10 mönnum. Bátur úr Vestmannaeyjum í sama mánuði með 4 mönnum.

Vélarbátur frá Norðfirði í sept, með 4 mönnum. Bátur frá ísafirði 29. sept., með 3 mönnum. Vélarbátur frá Súgandafirði 16. okt., með 4 mönnum, og aftur vélarbátur frá Súgandafirði 11. nóvember, með 6 mönnum. Auk margra minni slysa, sem hér verða eigi talin. Er þetta geypilegt tjón á einu ári, eigi síst héðan úr sýslunni, þar sem 3 vélarbátar hafa farist og menn af einum árabát, alls 18 manns. Nefna má og í þessu sambandi eiturmorðið í Reykjavík í nóvember, hryllilegt og einstakt í  sinni  röð.

Brunar og önnur slík óhöpp hafa verið með minna móti. Nefna má bruna sildarverksmiðjunnar á Dagverðarevri við Eyjafjörð. Tjón af ofviðri varð og allmikið víða, í október. siðastl.

Hjá oss íslendingum hefir árið verið allmikið umsvifaár, sumu miðað fram, en fáu aftur — Vér höfum yfirleitt gengið til góðs götuna fram eftir veg. Sá mun dómurinn verða síðar meir. Merkasti atburðurinn — og sá atburðuinn,

sem lengst lýsir af á þessu ári, er óefað stofnun eða tildrögin að stofnun Eimskipafélagsins. Ef alt fer með feldu og óskir þjóðarinnar rætast mun þessa árs verða minst með virðing og þakklæti íyrir það viðvik. Það sýnir ljóslega löngun þjóðarinnar til þess að vera sjálfri sér nóg, og fórnfýsi margra einstaklinga fyrir því málefni, er þeir telja þjóðinni til hagsældar. Einhuga heillaósk fylgi þessu máli inn á nýja árið.

Stjórnarfarið er það mál, sem þjóðin lætur sig jafnan miklu skifta. Árið út og árið inn er þar sókn og vörn á báðar hliðar. Þetta ár hefir ekki farið varhluta af slíku, fremur en mörg önnur undanfarin ár. Þingið bar þó gæfu

til að samþykkja ýmis merk mál, og afgreiða stjórnarskrárfrumvarpið og er það mál nú komið á svo góðan rekspöl, að vandalaust ætti að vera að koma því í höfn.

Skærur nokkrar voru í þinginu, en þó var meira úr þeim gert en þær verðskulduðu. Þjóðin á eftir að leggja dóm sinn á það mál. Hún á eftir að segja, hvort henni líkar betur að stjórn og þing vinni sem best saman á þinginu, komi saman til að afreka eitthvað, eða hvort hún vill að þingmenn eyði þingtímanum í hégómlegar stælur og hnútur, og rífi niður hver fyrir öðrum. Lá við sjálft að alt færi á sömu leið á þinginu í ár og 1911.

Þjóðin galt þá þeim mönnum rauðan belg fyrir gráan, sem beittust fyrir að koma öllu á ringulreið og ætluðu sjálfir að brjótast til valda. Og allar horfur eru á því, að eins verði enn þá.

Merkustu erlendu viðburðirnir eru fyrst og fremst Balkanstyrjöldin, sem vikið hefir verið að hér að framan. Auk þess hafa og verið ýmsar þjóðfélagshreyfingar og óeirðir víðsvegar um heim, en þó ekki svo miklar né merkar, að þær marki veruleg spor.

Mjög stórkostlegu mannvirki hefir orðið lokið á þessu ári, þar sem er opnun Panamaskurðsins til fullra afnota, sem tengir saman Atlantshafið og Kyrrahafið. Frakkar byrjuðu á þessu mannvirki skömmu eftir 1880, og Lesseps, sá er hafði staðið fyrir Suezskurðinum, stofnaði feikna stórt hlutafélag í því skyni, að gera skipgengan skurð gegn um Panamaeiðið. En eftir nokkur ár var alt hlutaféð uppetið, en verkið skammt á veg komið.

Siðan urðu uppvís hin megnustu fjársvik hjá forstöðumönnunum og Lesseps sjálfur var dæmdur til fangelsisvistar. Fyrir nokkrum árum byrjuðu svo Bandamenn á verki þessu, og var því svo lokið í haust og skurðurinn opnaður

með mikilli viðhöfn. Af nafnkunnum erlendum mönnum, sem létust á árinu, má nefna: Georg Grikkjakouung, er var myrtur 18. mars, Pierpont Morgan, ameríska auðmanninn, Bebel, jafnaðarmannaforingjann þýska, Dr. Diesel og Edward Milne, enskan vísindamann.

Slys hafa og orðið nokkur, t. d. kolanámuslys mikið á Bretlandi í haust, og Volturnoslysið, þar sem margt manna druknaði.

Björn Baldursson Björn Baldursson | miđvikudagurinn 1. janúar 2014

Gleđilegt ár!

Byggđasafn Vestfjarđa ňskar vestfirđingum og landsmönnum öllum gleđilegt árs og farsćldar á komandi ári.
Björn Baldursson Björn Baldursson | föstudagurinn 15. nóvember 2013

Fiskćtasálmur Hallgríms Péturssonar

Fiskætasálmur Hallgríms Péturssonar flokkast víst ekki undir hefðbunda sálma, heldur er hann þarna að lofa og prísa það sem almættið færir honum af sjávarfangi. Má af þessu sjá og lesa í neysluvenjur Íslendinga á sautjándu öldinni.

 

Afbragðsmatur er ýsan feit, 

ef hún er bæði fersk og heit, 

soðin í sjóarblandi. 

Líka prísa ég lúðuraf. 

Lax og silungur ber þó af 

hverskyns fisk hér á landi.

Langan svangan 

magann seður, 

soltinn gleður. 

Satt ég greini. 

Úldin skata er iðra reynir.  

 

Morkinn hákarl, sem matar hníf,

margra gerir að krenkja líf. 

Ríkismenn oft það reyna. 

Um háfinn hugsa húskar meir. 

Hann í eldinum steikja þeir. 

Brjósk er í staðinn beina. 

Hlýrinn rýri, 

halda menn 

af honum renni

hræðileg feiti. 

En rauðmagi er besti rétturinn heiti.  

 

Karfinn feitur ber fínan smekk. 

Fáum er spáný keilan þekk. 

Upsinn er alls á milli. 

Þorskurinn, sem í þaranum þrífst, 

þrefaldur út úr roðinu rífst. 

Frá ég hann margan fylli. 

Þorskinn, roskinn, 

rifinn, harðan, 

rétt óbarðan 

ráð er besta 

að bleyta í sýru á borð fyrir presta.

Björn Baldursson Björn Baldursson | mánudagurinn 28. október 2013

Lok veturnátta

Í gærkvöldi lauk dagskrá veturnátta. Henni lauk með ballettsýningu í Turnhúsinu þar sem þær Salóme Katrín Magnúsdóttir og Sigrún Lísa Torfadóttir, eða dansdúettinn "Spegilmynd" sýndi dansatriði og að loknum  dansinum var kertafleyting í fjörunni. Nokkur fjöldi fólks var á svæðinu og lét fólk kuldann ekki á sig fá, en nokkuð kalt var í veðri og snjókoma.

Björn Baldursson Björn Baldursson | föstudagurinn 4. október 2013

Skilma

Skilmur
Skilmur

Áhald það sem er á myndinni hér til hliðar nefnist skilma, tréfiskur með blýi á endanum og var notuð við landnótaveiðar á síld. Þá gengu síldartorfurnar oft mjög nálægt landi. Nótin var þá  fest í annan endann í landi og farið með hinn endann á bát og kastað fyrir torfuna og tekinn bugur um síldartorfuna og farið í land með djúpendann. Þá var síldin komin í svokallaðan "lás", blýteinninn í nótinni lá við botninn og korkteinninn á yfirborðinu og komst því síldin ekki út. Skilman gegndi því hlutverki tálbeitu til að halda síldinni inni í nótinni meðan verið var að draga hana að landi, var henni þá kastað fyrir síldina og síðan dregin að landi, og elti þá síldin skilmuna. Í lásnum var síldin oft geymd í marga daga og var tekið úr lásnum smátt og smátt með svokallaðri "úrkastnót". Smásíldin var aðallega notuð í beitu. 

Björn Baldursson Björn Baldursson | ţriđjudagurinn 24. september 2013

Myndir frá hópsiglingunni

Gestur frá Vigur, Hermóđur úr Ögurvík og Gunnar Sigurđsson. Ljósm: Halldór Sveinbjörnsson.
Gestur frá Vigur, Hermóđur úr Ögurvík og Gunnar Sigurđsson. Ljósm: Halldór Sveinbjörnsson.
1 af 7

Halldór Sveinbjörnsson ljósmyndari var á hafnarkantinum um daginn og tók frábærar myndir af bátaflotanum okkar. Þetta eru falleg fley.

Björn Baldursson Björn Baldursson | fimmtudagurinn 19. september 2013

Siglt um pollinn

Í gær efndi Byggðasafnið til siglingar um Pollinn á Ísafirði á þeim bátum safnsins sem sjófærir eru. Það voru Þeir Gestur frá Vigur, Jóhanna frá Dynjanda, Hermóður frá Ögurvík, Eljan frá Nesi og Gunnar Sigurðsson frá Ísafirði. Elsti báturinn er frá 1906 og sá yngsti frá 1974. Smalað var saman trillukörlum til að sigla fleyunum og sigldu bátarnir um Pollinn nokkra stund. Jóhannes Jónsson kvikmyndatökumaður var um borð og tók þessar myndir.  Smellið á hlekkinn hér fyrir neðan og lítið á ...

 

http://www.ruv.is/sarpurinn/frettir/19092013/siglt-um-pollinn-a-isafirdi

Björn Baldursson Björn Baldursson | mánudagurinn 16. september 2013

FRAM slúttar vertíđinni í ár

1 af 4

Í morgun kom skemmtiferðaskipið FRAM til Ísafjarðar. Það er síðasta skip sumarsins og tók Ísafjörður á móti farþegunum með hryssingskulda og vindstrekkingi. Um 170 manns komu til okkar í dag á þessum síðasta formlega opnunardegi sumarsins. Alls hafa þá komið á safnið í sumar um 12000 manns og viljum við þakka öllum kærlega fyrir komuna.

« 2017 »
« Ágúst »
S M Ţ M F F L
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31    
Vefumsjón